اسباب اختيار الشباب للهجرة رغم صعوبة الطريق !!
كتر الكلام في الفترة الاخيرة عن الهجرة الي البلاد الأوروبية وخصوصا ايطاليا واليونان.
فتعالوا نشوف اية هى الأسباب اللى بتخلى الشباب يسيبوا بلادهم وأسرهم ويلجوؤا الى ركوب الصعب وانهم يعرضوا انفسهم للخطر ؟
*- فى بعض الشباب مهتم بالبحث العلمي وبينظروا لأفق اوسع فبمجرد ما بيتعرض عليهم اى منحة دراسية بالخرج على طول بيقبلوها دون تردد .
ودا اكيد لانهم بالخارج بيلاقوا الجو المناسب والفرصه اللى بيقدروا من خلالها استغلال كل طاقاتهم وبالتالى بيحققوا مستوي معيشي عال ودا بيكون سبب للتفرغ التام لأبحاثه العلميه.
*- والبعض الآخر من الشباب عادة بعد ما بينهوا دراستهم بيفكروا في العمل والزواج وتكوين اسرة ودى سنة الحياة وحلم اى شاب وفتاه .. ، ولكن ظروف المعيشة والحياة الصعبة بتخليهم يفكرون فى الهجرة كنوع من الهرب من الأوضاع الخاطئة، وهم دول الشباب الى هانتكلم عنهم وعنمشاكلهم ومتطلباتهمز
*- انتشار البطاله بشكل فظيع وضآلة فرص العمل بل واحيانا انعدامها تماما وظروف المعيشة الصعبه ولو حصل وقدر الشاب ان يحصل على فرصه عمل, فالمرتب بيكون قليل لدرجه انه مش بيكفي حتي للمواصلات اللي بيروح بيها للشغل فيلاقى الشاب نفسه من غير عمل ولا عائد مادى ولا زواج.
*- الواسطة في التعيين اللى بتحرم الشباب من الحصول على فرصتهم الحقيقيه فى العمل المناسب له بما يتوافق مع مؤهله وتخصصه الدراسى فيصبح معيار الاختيار في العمل مش معيار الكفاءة لكن معيار الواسطة والكوسه.
*- احساس الشباب انهم مواطنين من الدرجة الثانية في وطنهم, والاحساس دا احساس سئ جدا ودا طبعا بيخليهم يفكروا في ترك بلدهم الي بلد آخر وفى تصورهم انها ممكن تديلهم الحق والحرية في التعبير عن رغباتهم وتحسسهم أنهم مواطنين من الدرجة الأولي.
*- واحيانا الشباب بيعتقدوا ان الهجرة هى المخرج الوحيد لتحقيق احلامهم والصورة الجميلة اللى فى خيالهم وهى حصولهم على سيارة فخمة وفيلا ورصيد فى البنك هائل وحياة مرفهة وبذخ وابهار الناس.
*- وطبعا من الاسباب اللى ساهمت فى تعقيد الكثير من الشباب نفسيا بل وفى بعض الحالات اصبح الاب والام يشاركون ابنهما نفس الحلم ويضحوا بكل غال ونفيس لمساعدتهم على الهجرة طمعا فى الثروة وتحسين الوضع الاجتماعى والاقتصادى للاسرة باكملها مثل ما شاهدوه مع بعض الشباب اللذين تحسن وضعهم بهذة الصورة وما رأوه لما رجع بعض الشباب المهاجرين اللى حالفهم الحظ بسيارات فخمة وفلوس كثير.
*- ومن الاسباب بردوا اللى شجعت الشباب اسباب خاصة بالدولة الجاذبة ( المهاجر اليها ) انها بتوفر للمهاجرين دخولا مرتفعة وفرص عمل مناسبه لهم ولمؤهلاتهم بالاضافة الي التسهيلات الادارية التي تمنحها بعض الدول في الحصول علي الجنسية.
اصدقائى فى انتظار رأيكوا ومشاركتكم ومزيد من اسباب هجرة الشباب من وجهة نظركوا
انتظرونا فى الجزء الثانى والنتائج المترتبه واثر الهجرة على البلد وعلى الشباب وعلى كل شئ
0 التعليقات:
إرسال تعليق