الوقت غير المستثمر خارج نطاق العمر

تعالوا مع بعض نشوف ممكن نقسم يومنا ازاى ؟؟

استغلال الوقت بالطريقه الصح

ودلوقتى بعد ما كلنا عانينا من مشكله وقت الفراغ وكل واحد عنده مشكله الوقت اللى مش لاقى حاجه يعملها فيه تعالوا مع بعض نشوف ممكن نقسم يومنا ازاى

* الفتره الصباحيه :

- طبعا اول حاجه نبدا يومنا بطاعه ربنا وبعد ما نؤدى الفروض اللى علينا
نمارس اي نوع من انواع الرياضه لانها بالتأكيد بتزودنا بالنشاط والحيويه وبتخلينا نبدأ يومنا بسعاده وبتفاؤل.


- بعد كدا نتصفح بعض الصحف اليوميه لمعرفه الاخبار بوجه عام سواء الاخبار السياسيه او الرياضيه او حتى الاستماع اليها عن طريق الراديو او التليفزيون.


- بعد كدا نشوف ازاى نقدر نكون احسن ونستغل وقتنا صح زى مثلا
اننا نطور من نفسنا ونمى مهارتنا اكيد كل واحد لو قعد مع نفسه ودور جواة كويس هيلاقى نفسه عنده مهاره معينه يبدأ بقى ينميها ويطورها .


- ناخد كورسات ودورات كل واحد طبعا على حسب تخصصه او على حسب المجال اللى بيحبه

*فترة الظهيره :

- نقضى هذا الوقت فى نفع عباد الله بقدر المستطاع وقضاء حاجتهم يعنى مثلا ندور فى المنطقه اللى عايشين فيها على دار مسنيين او دار ايتام ونزورهم ونقدم ليهم بعض المساعدات او نشترك فى جمعيات خيريه نساهم بمجهودنا فى العمل التطوعى وفعلا بنحس بفرحه ومتعه كبيره ياريت بس نجرب.


- نشوف اصدقائنا القدامى ونرجع صداقتنا معاهم مره اخرى ونوطد علاقتنا بيهم.
- نتعرف على اصدقاء جداد ونكون حريصين انهم يكونوا من الاصدقاء الصالحين

* الفتره المسائيه الاولى :

- المسجد نحاول نتعلم فيه قراءه القران وكيفيه الصلاه التعلم اكثر عن رسولنا الكريم والصحابه ، كثير من الخبرات لانستطيع تعلمها من المدرسه او الاسره.


- زياره الاقارب والحرص على صله الرحم وتبادل الزيارات مع الاصدقاء.

* الفتره المسائيه الثانيه :

- البرامج الاذاعيه( الراديو )
نسمع برامج ثقافيه هادفه تزودنا بالمهارات والمعارف.


- البرامج التليفزيونيه
نشاهد البرامج المفيده التى تقدم معلومه مفيده او مهاره يمكن ان نتعلمها ونستفاد منها.


- نجلس مع افراد اسرتنا نتكلم ونستفيد من خبرات الاهل وخبرات الوالد والوالده ونناقش مشاكلنا اليوميه وطبعا دا بيساعدنا على توطيد العلاقات الاجتماعيه.


- المهارات الاجتماعيه شئ مكتسب ومن الافضل اننا نحاول اكتسابها من الان لاننا لو تعودنا على الوحده سيكون من الصحب التخلص منها ودا طبعا مش من مصلحتنا.


- اخر حاجه بقى نختم يومنا بالقراءه ودى طبعا مجالاتها كتيره ومتنوعه ما بين روايات وقصص وكتب للتنميه الذاتيه لكن لابد ان نختار كتب مفيده لدينا او دنينا

اعداد : راغدة الدهشان

ايه هو هدفنا وازاى نقدرنحققه

لازم كل واحد مننا يسأل نفسه الاسئله دى عشان نقدر نعرف هدفنا من الحياه

حدد هدفك ولازم تحققه

1- هو ليه ربنا خلقك في هذه الدنيا؟

فى الاول يا جماعه لازم ندرك ان من كرم ربنا علينا انه اوجدنا فى الحياه عشان نستمتع بيها ونعيش اجمل ما فيها ، يا جماعه والله احنا غالين قوى عند ربنا احنا اللى ربنا سخر لنا السماوات والارض .

- ربنا خلقك عشان مطلوب منك رساله لازم تأديها سواء تجاه نفسك او تجاه غيرك .
- ولو تلاحظ انك لازم فى حياتك تختبر إرادتك ، والى اى مدى ارادتك منجذبه الى الخير ولا الشر.
- فحياتك دى ما هى الا فترة اختبار لازم تستعد له كويس جدا عشان تقدر تجتازه وتنجح ودا هايكون عن طريق ادراكك انك وراك رساله لازم تؤديها فبقدر ما تكون رسالتك قوية ونافعة ، بقدر ما تكون حياتك انجح واكثر سعاده، واكيد النجاح دا والسعاده دى هاتتنقل للناس اللى حواليك لاسرتك ولاصحابك ولكل من حولك .

2- انت مين وايه تعريفك لنفسك وهل انت تعرف نفسك كويس ؟

لازم تعرف انك افضل مخلوق خلقه الله على وجه الارض .
اى انسان عنده مجموعة من المميزات والصفات والعادات والصفات دى موجوده عند كل شخص وهى دى اللى بتميز كل شخص عن غيره من الناس , و لذلك فإننا نجد أن كل شخص ينفرد بصفات و مميزات خاصة به و لديه عادات و طقوس معينة تكٌون جزءاً من شخصيته المستقلة المتنفرده .

3- مين اصحابك وهل هما فعلا خايفين عليك وعلى مصلحتك ولا لا؟.

الاصحاب هما دول الي بنحتاجهم لما نزعل وبنكون معاهم لما نفرح ونفضفضلهم وناخد رايهم لما نحتار .
الاصدقاء الحقيقيين هما اللى بيرشدوك للطريق الصح وهما اللى خايفيين عليك وعلى مصلحتك وهما الى بيتمنولك كل خير وعمرهم ما بيسيبوا حد فى مشكله الا ما بيساعدوه انه يخرج منها بأى طريق و هما كمان اللى بيقدروا الصداقه جدا جدا جدا.
لازم ياجماعه كلنا نسأل نفسنا هل الصفات دى موجوده فى اصحابنا ولا ؟ هل هما اصدقاء صالحيين ولا اصدقاء سوء لان فعلا الصاحب ساحب وبيهم بتنجح او بتفشل لان تقريبا بتكون نفس الميول ونفس طريقه التفكير.

4- امتى هاتعتمد على نفسك وهل تقدر تعتمد على نفسك وتشق طريقك في الحياة من غير الاعتماد الكلي على الغير؟!!!!!.

الاعتماد على النفس وعدم الاعتماد على الغير من اهم طرق الفوز و النجاح،
فعلا الاعتماد على النفس درجة من درجات سلم التقدم والرقي و النهوض و الإصلاح.
ان الاعتماد على الغير وسيله لايلجأ اليها الا الشخص الكسول الذى لا يريد تحمل المسؤليه .

احنا ياجماعه محتاجين حد يفوقنا محتاجين حد حد يوقظنا من غفلتنا محتاجين حد يساعدنا ويقوينا ويدينا همه ودفعه عشان نفوق بقى ونقدر نعيش فى الدنيا دى مرتاحين وبسوطين وسعداء وننسى بقى الملل والزهق والاكتئاب والتعاسه الى كلنا حاسيين بيها

يالا ناخد بإيدين بعض ونشوف احنا ممكن نعمل ايه وازاى نعيش صح ؟

ومنحنا الله مواهب وقدرات وامكانيات عظيمة بداخل كل منا.

مهمة الانسان بقى انه يكتشفها بنفسه ويثقلها ويشق طريقه بقى ويشغل نفسه بيها وبأى طريقه لازم يحقق اهدافه ويشغل اوقات فراغه

وقت الفراغ وقيمه الوقت الضايع

وقت الفراغ مشكله يعانى منها الكثير من الشباب والفتيات

حرام علينا الوقت يضيع من ايدينا

من كتره الوقت الضائع لدينا ووقوفنا حائريين لانجد ما نفعله فى هذه الاوقات نصاب باحساس مؤلم نصاب بالملل والياس والاحباط والزهق ....

نصاب بعدم شعورنا بقيمه للحياه وان ليس لدينا دورا نؤديه فيها.

نشعر دائما اننا ليس لنا فائده والسؤال الذى يلح مفسه علينا دائما ونسأله لانفسنا لماذا نعيش فى هذه الدنيا من الاساس وما هو هدفنا من الحياه؟

بعد انتهائنا كاشباب وفتيات من الدراسه سواء اثناء العطلات الدراسيه الصيفيه فى الاجازات المدرسيه يعنى او الانتهاء الدراسى تماما بعد المرحله الجامعيه نجد انفسنا امام الصدمه الكبرى وهى عدم قدرتنا على الحصول على فرصه عمل مناسبه ونفاجأ بقعودنا فى المنزل دون اى هدف ومن هنا تبدا تظهرمشكله المعاناه من وقت الفراغ .

وطبعا ليس لدينا اى بديل الا قضاء هذا الوقت بهذه الطرق ؟

** اما قضاءه مع اصدقائنا وصديقاتنا ما بالحديث عن طريق التليفون او جلسات الشات على الانترنت وبالفعل هذه الجلسات تقضى على الوقت ، حيث تطول الساعات دون مبرر، ولا يتخللها إلا كلام تافه، قد يكون سبباً للمشاكل والآثام.

** الجلوس امام التليفزيون والسهر امامه لفترات طويله مما يساعدنا على البحث عن القنوات السيئه ومشاهدتها والتى بالطبع تفقدنا كا شباب وفتيات مبادئنا واخلاقنا .

** الخروج خارج المنزل وبالطبع دون هدف محدد فنذهب الى المولات او اماكن الفسح بمختلف انواعها او السير والتخبط فى الشوارع او الجلوس على المقاهى اودخلوا دور السينما ؟

** وكل هذا يؤدى فى النهايه الى تعرفنا على شباب وفتيات يعانون من نفس مشكلتنا وهى وقت الفراغ والملل وبالطبع هذه هى الصحبه السيئه التى تؤدى فى النهايه الى الوقوع فى الاخطاء وممارسه جميع العادات السيئه ومن الممكن ان تصل لحد دمار وضياع مستقبل الشباب والفتيات .

كثير منا كشباب وفتيات يريدون ان يتعلمون كيف يستطيعون قضاء أوقات فراغنا، واستغلالها بصورة إيجابية ومفيدة

وهذا ما سوف نطرحه فى الموضوع القدام

اعداد : راغده الدهشان